اعملى كونتور بالمكياج لنفسك
مين فينا معجبهاش مكياج الممثلات و تقسيمة وجههم او فكرت ازاى تخفى عيوب وشها زيهم . عايزة تتعلمى ازاى تصغرى انفك او تخبى القورة العريضة و تبرزى جمال وجهك يبقى لازم تتعلمى فن الكونتور و الهايلايت اللى بقى موضة جدا الايام دى و بقى من السهل جدا ان احنا نعمله لنفسنا فى البيت تعالى شوفى ازاى…
اولا : ايه الفرق بين الكونتور والهايلايت ؟
الهايلايت highlight
ده بيكون كريم او بودر لونه فاتح ومضئ كده بيعمل لمعة على الخدود او على عضمة الحاجب مش الوش كله يعنى بيتحط على الاماكن الى عاوزة تبرزيها والفاتح فى الاماكن الى عاوزة تظهريها بيكون فى نص الجبهة وعلى عضمة الانف والخدود نفسها وفوق القوس بتاع الشفة العليا ده وفى نص الدقن.
الكونتور contour
ده الى هو نحت الوش بيكون كريم غامق بتحطيه فى الاماكن الى عاوزة تخفيها زى مثلا جوانب الجبهة وجوانب الانف وجوانب الوش من تحت خالص الى هى عضمة الوش الى تحت خالص والحتة الى هى تحت الخد بعد عضمة الخد على طول.
الادوات اللى هتحتاجيها :
1 – الكونسيلر
2- كريم الاساس
3 – فرشة للمزج
4 – باليت الكونتور حسب درجة لون بشرتك
5 – بلاشر او برونز للهايلايت
الخطــوات
1 – كريم اساس
اول حاجة هتستعمليها هى كريم الاساس السائل علي الوش كله وده عشان ينعم البشرة ويخلي مزج الهايلايت والكونتور مع بعد سهل.
2- الهايلايت
– جهزى الهايليت واللى لازم يكون افتح بدرجتين أو ثلاثة من الكونتور
–ابدأي بتحت العين علي شكل مثلث وشدي خط لغاية قرب الشعر كده.
–ارسمى خط مستقيم في نص أنفك و ارسمى خط أفقي صغير أعلى الأنف. وهنرسم خط صغير تحت الأنف.
– ارسمى أكتر من خط أفقي من بين حواجبك لحد نصف منطقة (القورة), هنكتر من الهايلايت لو قورتك صغيرة وهنقلل لو قورتك كبيرة.
– عند الذقن ارسمى خطوط طولية أو عرضية وهتكتري لو ذقنك صغيرة وهتقللي لو ذقنك كبيرة.
– وللخدين ارسمى عند أعلى عظام الخد وامزجيها مع المثلث اللي تحت العين.
3- الكونتور:
– إبراز عظام الخد : ارسمى خط مستقيم من الأذن لحد نص الخد، وكرري على الخدين.
– عشان جبهتك تكون أصغر: ارسمى خط مستقيم موازي لخط الشعر من جانبي الرأس.
– لأخفاء الذقن : ارسمى خط موازي لخط الفك السفلي وهنرسمه تحت ما رسمنا الهايلايت.
– لتصغير الأنف : ارسمى خط رأسي مستقيم على جانبي الأنف ووصلى الخطين أعلى الأنف عشان تحصلي على شكل U.
4 – المزج
امزجى و ادمجى كل أجزاء الوجه اللى حطينا عليها الكونتور مع بعض
افردى و امزجى كل جزء مع باقي أجزاء الوجه مع بعض بالفرشاة لتحصلي على شكل وجهك النهائي.
كل وجه و ليه تقسيمته و مميزاته و عيوبه و دى صورة بتوضح اماكن الهايلايت و الكونتور لاشكال الوجه المختلفة زى الوجه البيضاوى و المربع و غيرها.